D' Mei kommt en Denscht noch Oppenau,
"Horch", sait ihr Muater, "schreib mer au!
Von allem, wia da's drüba hoscht,
Vom Lohn, vom Schaffa-n-ond der Koscht!"
Ond richtig! noch en Wocha drei
Kommt schaun a Briafle von der Mei.
Se schreibt, so guat se's halt verstoht,
Wia's ira-n-en der Fremde goht.
Ond no zom Schluß heißt's: "Jetz b'hüat Gott!
I bein so müad, ond 's ischt so spot,
Ond wann i alles schreiba wett,
Iar en Europa glaubtet's net!"