Kenderzucht

D'Mei nemmt iarn Jengschta mit em Kütschle,
A Dickköpfle mit a ma Rollabütschle.
Do kommt der Pfarr: "Grüaß Gott," sait der
"Du Dickerle, gib's Bätschle her!
Der hat zwei Backa, descht a Freud,
Was tunt ihr, daß er so gedeiht?"
"O." sait d' Mei, "der ischt ansa klein
An elends liedrichs Kendle g'sein.
Kein Milch kein Süpple hot er g'möcht
Ond, was er ißt, des macht am schlecht.
No brengt amol am Maiatag
Der Mein a Knackwurst heim em Sack,
Er hebt's em Spaß em Büable nan
Ond was! mein Manle packt se an.
Er schobbt ond mampft ond druckt ond schluckt,
Miar Alte, miar henn no so guckt.
"Ha! wenn's am guat macht", sait mein Man,
"Kommt's alltag uf a Wurst net an."
Ond richtich, 's ischt am guat g'sein druf,
Jetz ziega mer'n mit Knackwürscht uf."