Em Dorf wird heut' beim Waisag'richt
Der Bergles-Regel Erbschaft g'schlicht't.
No! d'Sach goht glatt ond kommt en's Blei,
De andre onterschreiba glei,
Blos d'Regel stellt se widerwärtich:
"I schreib' net onter", sait se, "fertich!"
A G'meinrot nemmt se ens Gebet,
's hilft nenz! Se sait: "I schreib' halt net!"
Der Schulz fahrt drein mit Blitz ond Donder,
Se bleibt derbei: "I schreib' net onter!"
Der G'richtsnotar meint: "Send doch g'scheit!"
"Net om a Küahle!" hot se g'sait.
Jetz sait der Schulz: "I mein, 's ischt's bescht',
Mer steckt des Weibsbild en Arrescht."
"O je!" schreit d'Regel, "leant me gaun!
Jar Herra! i will alles b'staun!
I schreib' mein Nama blos net nan,
Weil i, - weil i net schreiba kan!"