Naturforscher

Zween Stuagarter Buaba gean mitanand
Dur'n Wald ond suacha do allerhand.
Der ein fangt en Heuschreck ond b'sieht an dur d' Brill
Ond sperrt an en d' Schachtel ond sait: "'s ischt a Grill."
No sieht er a Krötle em Gras ommerhupfa,
Des lot er als Laubfrosch en d'Schachtel nein schlupfa.
No goht's an en alta horicha Raupa,
Au der muaß an's Buaba sein Schächtele glauba.
Ond suscht no viel kriachichs ond krabbelichs Vieh
Kommt eine en d' Schächtelesmenagerie.
Der ander,der sammlat seltene Pflänzle
Ond packt's glei buschelweis nein en sein Ränzle,
So Gänsbleamle, Schmalzbloama-n-ond allerlei Gras,
Er b'siehtts mit de Auga-n-ond hebt's onter d' Nas,
Manchmol leiht am au der ander sein Brill
Uf einmol stean beide vor ebbes reckstill:
Am Boda dran send schwarze Kugele g'sein,
"Des send Rehböllele", sait der ein.
"Ja, siehscht", sait der ander, "do wo mer dia fendt,
Do weiß mer, daß do vorher Reh g'standa send."