Der Staat

Drei Burger send am Wirtstisch dran,
Dia hent's a wenga g'spürt,
Drom wird, so guat's a jeder kan,
Politisch dischkeriert.

z'erscht wird so duranander brommt,
No allsg'gmach räsoniert,
Ond wia's an Steurazahla kommt,
No lauft en's Maul wia g'schmiart.

"Jo", sait der ein, "jetz glaubat miar,
Wo d' Preußa Meischter send.
Mit Miletär ond Offeziar,
Nemmt 's Zahla nia kein End."

Der ander sait: "Des Herrapack,
Des koscht a Massion,
Ond 's wird net besser, wia-n-i-sag,
Bis mers jagt all' davon."

"O", sait der dritt, "was wissat iar!
Jetz i sag's offa raus:
Der Staat der ischt a Säugetiar,
Der saugt dia Burger aus."